ஆழி-அர்ஜூனா 5

f42cc29119d311a167324f82b8fc09d6

பவித்ரன் கட்டிலில் அலுங்காமல் நலுங்காமல் செத்துப்போயிருந்தான். அவனது நெஞ்சில் சமீபத்தில் குழந்தையோடு இறந்து போயிருந்த அவன் மனைவி ரியா போட்டிருந்த பான்சி நகைகள், ஸ்டிக்கர் பொட்டுப்பாக்கட், ‘மாட்டே’ லிப்ஸ்டிக் இத்யாதிகளை கொண்ட பெட்டியை அணைத்தால் போல பிடித்துக்கொண்டிருந்தான். பெட்டி திறந்திருந்தது. அதில் ஒரே ஒரு ஜிமிக்கி மட்டும் விலகி அவன் கையில் கிடந்தது.

ரொமான்டிக்காக ஒரு கொலை!!!

ஜிமிக்கி!!!

ஆம் அந்த ஜிமிக்கியில் இருந்த ஹைட்ரஜன் சயனைட்  பவித்ரனின் கையை சேர்ந்து தோல் வழியாக அவனது உயிரைக்குடித்திருந்தது.

நல்ல கற்பனைதான் ! ஆனால் அந்தப்பெட்டியில் மற்றைய பொருட்களின் மீது சேர்க்கப்படாத சயனைட் அந்த ஜிமிக்கியில் மட்டும் ஏன் விசேடமாக பூசப்பட்டிருந்தது? பவித்ரன் அதைத்தான் எடுப்பான் என்று கொலையாளி எப்படி ஊகித்தான்?

அர்ஜூனா தானே எழுத்தாளனாகவும் தானே வாசகராகவும் நின்று மனதில் கதையை விவாதித்தபடி வேகமாய் விரல்களால் கீபோர்டில் தாளமிட்டுக்கொண்டிருந்தார். இருள் விலகி விடியலாக பூமியின் மீது படரத்தொடங்கி ஒரு நாளிகை கடந்திருந்தது. அரைமணிநேரமாக அவ்வப்போது உறுமி உறுமி ஓய்ந்து கொண்டிருந்த வாகனச்சத்தம் அவர் காதுகளில் விழாமலில்லை. அது என்னவாக இருக்கும் என்பது தான் தெரிந்த விடயம் ஆயிற்றே!

செய்யும் செயலால் வரப்போகும் விளைவுகளை தாங்கிக்கொள்ள முடியாதவர்களெல்லாம் வீர சாகசம் புரிய ஏன் புறப்பட வேண்டும்?

செய்வதை எல்லாம் செய்து  விட்டு புகைப்படங்கள் வெளியானதும்  அதை தாங்கிக்கொள்ள முடியாமல் தற்கொலை செய்து கொள்ளும் சராசரி பெண்வர்க்கத்தின் மீது அவர் என்றுமே இரக்கம் கொண்டதில்லை.

புறச்சமூக பார்வை மீது இத்தனை அச்சம் கொண்டவர்கள் எதற்காக அச்செயலை ஆரம்பிக்க வேண்டும்? அப்படியே ஆரம்பித்தாலும் மாட்டிக்கொள்ளாமல் காரியமாற்ற வேண்டாமா?

யோசிக்காமல் செயற்படுவதெல்லாம் எதிராளி இரக்கம் காட்டுவான் என்ற நம்பிக்கையில்  தானே?

அவர்களுக்காக தன்னுடைய பொன்னான மணித்துளிகளின் ஒற்றை நொடியைக்கூட அவர் வீணாக்க விரும்பவில்லை

கர் கர் கர் ஹாலில் இருந்த மணிக்கூட்டுக்குள் இருந்த புலி ஆறுமுறை உறுமி ஓய்ந்தது. செய்து கொண்டிருந்ததை அப்படியே நிறுத்தி விட்டு அவர் எழ அதற்குள் இடப்புற அறையில் இருந்து “அஜூ” என்றபடி வெளியில் வந்தாள் யாழினி. அதற்குள் பல்துலக்கி முகம் கழுவியிருந்தாள் என்பதற்கு ஆதாரமாக அவளது ப்ரூஸ்லீ நைட் ஷர்ட் மேற்புறமாய் நனைந்து போயிருந்தது.

“குட் மோர்னிங் யாழ்! நீ எழும்ப முன் காபி போட்டு விடலாம் என்று நினைத்தேன். இன்றைக்கும் நீ என்னை முந்தி விட்டாய்!!”! அவரின் முகத்தில் குறும்புச்சிரிப்பு பூத்தது.

“நீங்கள் தானே ஜெயிக்க பிறந்தவள் என்று என்னை சொல்வீங்க அஜூ!” அவரின் பின்னே கிச்சனை நோக்கி யாழும் கூட நடந்தாள்

“உங்களோட பவித்ரனுக்கு என்ன ஆச்சு?”

செத்து போய்ட்டான்

ஐயோ ஏன்?

அதை புரிஞ்சுக்கற அளவுக்கு நீ இன்னும் வளரல..

“அப்போ எனக்கு எதுக்கு கதை சொன்னீங்க?  பினிஷிங் கேக்கறதுக்கு மட்டும் நான் வளரணுமா?” நடந்து கொண்டிருந்தவரின் உதட்டை பார்ப்பதற்காக அவருக்கு முன்னே வந்து பின்புறம் திரும்பி ரிவர்சில் நடந்த படி அவள் வாக்குவாதம் செய்த அழகை ரசித்தபடி வந்தவர் சட்டென குனிந்து அவளைத்தூக்கி சமையலறை மேடையில் அமர வைத்து விட்டு காபிக்கான பாலை பானில் விட்டுக்காய்ச்ச ஆரம்பித்தார்

“கதைல வந்த அந்த யாழ்ப்பாப்பாக்கு என்ன ஆச்சுன்னு மட்டும் சொல்லுங்க!!!” அவள் விடுவதாக இல்லை!

‘உதடுகளைப்பார்த்து பேச்சை கிட்டத்தட்ட புரிந்து கொள்ளப்பழகி விட்டாலும் தானாக தன் குரலைக்கேட்டு சத்தத்தை கட்டுப்படுத்தும் தன்மையில்லாததால் மற்றவர்களை விட கொஞ்சம் உரத்துத்தான் பேசிக்கொண்டிருக்கிறாள்.’ அவள் பேசிய விடயத்தை மறந்து அவரின் மனம் வேறு ஆராய்ச்சியில் இறங்கி விட்டிருந்தது.

அஜூ!!!!

என்ன கேட்டே!!! யாழின் கோப்பையில் மட்டும் சர்க்கரை சேர்த்து நுரைக்க ஆற்றியவர் அவளிடம் நீட்டினர்.

அந்த யாழ்ப்பாப்பாக்கு என்னாச்சு?

அது அவங்கப்பா கூட போய்டுச்சு!!! சுவாதீனமாக சொல்லியபடி திரும்பி தன்னுடைய கப்பை எடுத்தவருக்கு யாழினியிடம் இருந்து பதில் வராததில் கேள்வியாய் திரும்பினார்.

அவள் கவனம் யன்னலுக்கு வெளியே இருந்தது!

அஜூ!!! அவங்க ரெண்டு பேரும் கிளம்பறாங்க!!!! அங்கே பாருங்களேன்.. பாக் எல்லாம் எடுத்துட்டு போறாங்க!!!  யாழினி யன்னல் வழியே பார்த்து கூவினாள்

அவள் தன்புறம் திரும்பும் வரை பேசாமல்  காபியை உறிஞ்சிக்கொண்டிருந்தவர் அவள் திரும்பி அவருடைய முகத்தை பார்த்ததும் “பார்த்தேன்” என்று சொல்லி விட்டு தன் வேலையை தொடர்ந்தார்

ஏன் போறாங்க?

அவங்களுக்கு நம்மையெல்லாம் பேஸ் பண்ண முடியலையாம்

“ஏன்?” என்று தனக்குத்தானே கேட்டபடி சற்று நேரம் சிந்தனையில் ஆழ்ந்திருந்தவள் பிறகு சொன்னாள்.

ஸ்டூடண்ட்ஸ் தப்பு பண்ணா எல்லார் முன்னாடியும் தானே டீச்சர் பனிஷ்மென்ட் கொடுக்கறாங்க? அதுக்காக ஸ்டூடண்ட்ஸ் ஸ்கூலை விட்டா போறாங்க?

என்னமாய் யோசிக்கிறாள் இவள்! என்று ஒருகணம் மலைத்தாலும் அந்தப்பேச்சில் நேரத்தை வேஸ்ட் செய்ய பொறுமை இல்லாததால் “பிறர் முன்னே நல்லவர்களாக நடிக்கத்தான் எல்லாரும் ஆசைப்படுகிறார்கள்” என்று தோளைக்குலுக்கியபடி அவளை இறக்கி கீழே விட்டு ஸ்கூலுக்கு தயாராகும் படி சொல்லி விட்டு தானும் தயாராக சென்றார் அவர்.

அரைமணி நேரத்தின் பின், அவசரமாய் குளித்து விட்டு வந்து யாழினிக்கும் தனக்கும் பான் கேக் தயாரித்து மேஜையில் எடுத்து வைத்து விட்டு அவளுக்காய் காத்திருந்தார் அர்ஜூனா

பரத் யாழினியை அர்ஜூனாவிடம் விட்டு சென்று இத்தோடு இரண்டு முழு நாட்களாகிறது. தன் ப்ரைவசி கெட்டுவிடுமோ என்று உள்ளூரப்பயந்தவருக்கு அவளின் அருகாமை ஒரு நிறைவைக்கொடுத்தது அவரே எதிர்பாராதது. அவளுக்கு வேளாவேளைக்கு காபி, சாப்பாடு, ஹோம் வர்க் என்று இந்த புதிய பொறுப்பினை அவர் மனம் உற்சாகமாய் ஏற்றுக்கொண்டது. அத்தோடு யாழினியும் அவரது நேரசூசிக்கேட்ப தன்னுடையதை சரியாக பொருத்திக்கொண்டதும் பேருதவியாக இருந்தது என்று தான் சொல்ல வேண்டும்.

யாழினி வந்ததும் சாப்பிட்டு முடித்து இருவருமாய் படிகளில் இறங்கி ஸ்கூலுக்கு போவதற்காக பஸ் ஸ்டாண்டை நோக்கி நடக்க ஆரம்பித்தார்கள். யாழினியின் பஸ் அங்கே ஒரு கால்மணிநேரமாவது நின்று கொண்டிருக்கும். ஆகவே அவசரப்பட வேண்டியதில்லை

அவர்களுக்கு முன்னே சற்று தூரத்தில் நடந்து கொண்டிருந்தவள் பார்வையில் பட்டதும்  அவரின் உதட்டில் சிரிப்பு கோடாய் நெளிந்தது.

ஆர்ணவி!

இவளைப்பார்க்கும் போதெல்லாம் ஏனோ பறவைக்கூட்டத்தில் இருந்து தொலைந்து தனியாகிவிட்ட பறவையொன்று ஆக்ரோஷமாய் அங்குமிங்கும் பரபரத்து தேடுமே அந்த ஞாபகம் தான் வரும் அவருக்கு~

அதற்குள் யாழினி ஆரா என்று உரக்க அழைத்து கையாட்டி அவளை நிறுத்தி விட்டிருந்தாள். அவளுக்கு மட்டும் கையசைத்து விட்டு கவனமாய் தன்னை தவிர்த்தபடி அவர்கள் நெருங்குவதற்காக காத்திருந்தவளை வேண்டுமென்றே ஏறிட்டுபார்த்தார் அவர்!

என்ன உன் தோழிகள் எல்லாம் போய்விட்டார்கள் போலிருக்கிறதே!

சட்டென்று ஒரு கோபம் முகத்தில் ஒட்டிக்கொள்ள அவரை அவள் முறைத்தது சிரிப்பை வரவழைத்தாலும் அவர் காண்பித்துக்கொள்ளவில்லை!

சரி சார். உங்கள் வாதத்தை நான் முழுமையாக ஏற்றுக்கொள்கிறேன். ஆனால் இப்படி வீட்டை காலி பண்ணி போகும் அளவுக்கு அவர்கள் மனம் வருந்திப்போகிறார்கள் என்று உங்களுக்கு கொஞ்சம் கூட பீல் ஆகவில்லையா சார்? அவள் குரலில் ஆயாசம்

இல்லையே!!!

என்ன மனுஷன் சார் நீங்க!!! என்று கோபமாக சொல்லிவிட்டு பாதையை அவர்களோடு சேர்ந்து கடந்தாள் ஆர்ணவி.

யாழினி வழக்கம் போல முன்னே செல்ல அவரருகில் வந்த ஆர்ணவியின் பக்கம் லேசாய் குனிந்தார் அர்ஜூனா.

“It is better to live your own destiny imperfectly than to live an imitation of somebody else’s life with perfection! “

“என்ன பார்க்கற? நீ காப்பி ரைட்ஸ் பத்தி நீட்டி முழக்க முன்னே நானே சொல்லிடறேன். இதை நான் சொல்லல.. பகவத் கீதைல பரமாத்மா சொல்லிருக்கார். முடிஞ்சா யோசிச்சுப்பாரு.. அப்படியும் உனக்கு புரியறது சந்தேகம்தான்” என்று சிரித்தவர் யாழினியின் பஸ்ஸில் அவள் தொற்றிக்கொண்டு கையசைக்க பதிலுக்கு கையசைத்து விட்டு பின்னால் வந்த பஸ்ஸில் தொற்றிக்கொண்டார்.

பின்னாலேயே ஆர்ணவியும் தொடர்ந்து வந்ததை காதருகில் கேட்ட அவளின் குரல் தான் உணர்த்தியது.

“சார்.. நீங்க சொன்னதை போல எனக்கு பகவத் கீதை மட்டுமில்ல. எனக்கு வேறெந்த புத்தகத்தில் வாழ்க்கையை பற்றி சொன்னாலும் புரியாது..படிக்கவும் பிடிக்காது. எனக்கு உணர்வுகள் மட்டும் தான் புரியும் சார். அவை எப்போதுமே தியரிகளில் அடக்கி விட முடியாதவை!”

ஓஹோ..

“சயன்டிஸ்ட் உங்களுக்கு நான் சொல்ல வேண்டியதில்லை. சமூக விஞஞான கொள்கைகளை பரிசோதிக்கும் பரிசோதனைகளில் எலிகளைப்போல மனிதனைபயன்படுத்தி  எப்போதுமே சோதிப்பதில்லை சார். ஏனெனில் மனிதன் தனிப்பட சுயமாக சிந்திப்பவன்! எல்லா மனிதனும் ஒரு தியரிக்குள் அடங்கிப்போகவும் மாட்டான் .ஆகே உங்கள் வறட்டு கொள்கைகளையும் புத்தகங்களையும் விட்டு விட்டு கொஞ்சம் வெளியே வந்து பிறர் உணர்வுகளை புரிந்து கொள்ள முயற்சி செய்யுங்கள்!”

அவளுடைய முகத்தின் கோபச்சிவப்பை பார்க்க வேடிக்கையாக இருந்தது அவருக்கு

உன் அறிவுரைக்கு நன்றி.. இப்போது வழியை விட்டாயானால் நான் அந்த சீட்டில் உட்கார்ந்து விடுவேன். ஹீரோ ஹீரோயினை வளைத்து பிடித்திருப்பது போலவே என்னை பிடித்து வைத்துக்கொண்டிருக்கிறாய்! அவர் சிரித்தபடி சொல்ல பட்டென கைகளை எடுத்துக்கொண்டு முகம் கன்ற முன்னே நகர்ந்தாள் அவள்.

“நாப்பது வயசாச்சு அவரின் நினைப்பைப்பார்.” அடிக்குரலில் அவள் வேண்டுமென்றே முணுமுணுத்தது அவரின் காதில் நன்றாகவே விழுந்தது

புன்னகையுடன் அவளை ஏறிட்டவர் நாற்பது இல்லை குழந்தாய்! நாற்பத்து இரண்டு!!!  என்று சொல்லிவிட்டு இருக்கையில் அமர்ந்தார்.

ச்சே….இவ்வளவு நேரம்  ரியாவின் ஜிமிக்கிக்கும் பவித்ரன் கொலைக்கும் அற்புதமாக போட்டிருக்க வேண்டிய ஸ்கெட்ச் இந்த பெண்ணோடு வீண் வம்பு வளர்த்ததில் வீணாகப்போயிற்று!!! அவருக்குள் தன் மேலேயே எரிச்சல் மண்டியது

“ஐடியா  ப்ளோவில் வர வேண்டும். இன்னும் ஐந்து நிமிடத்தில் இறங்கும் இடம் வந்துவிடும் ஆகவே சீக்கிரம் வா என்றால் ஐடியா வந்து விடுமா? ச்சே!!!” அன்று இறங்கும் வரை அவருக்கு எந்த ஐடியாவுமே கிடைக்கவில்லை. எரிச்சலுடனே இறங்கிப்போனார் அவர்.

அன்றைய நாள் இடைவேளை வரை மூச்சு விட நேரமின்றி அவரது நேரசூசி நிரம்பியிருந்தது. இடைவேளையில் காண்டீன் சான் விச்சை மென்றபடி பவித்ரன் கொலைக்கான ஸ்கெட்சில் பாதித்தூரம் முன்னேறியிருந்தவர் “சார்” என்ற மெல்லிய குரலில் கவனம் கலைந்தார்,

“பிரதாப் என்ன விஷயம்”

“சார்.. ஜனா டீச்சர் இன்னும் ஸ்கூலுக்கு வர ஆரம்பிக்கவில்லை சார். நாளை இன்ஸ்பெக்ஷன் வருகிறார்களாம். இதை செக் பண்ணி ஒரு சைன் போட்டுத்தருகிறீர்களா?” என்று கோரிக்கை வைத்தபடி ஒரு ரெஜிஸ்டரை நீட்டினான் அவன்

கொடு என்றபடி அதை வாங்கி கண்களால் மேய்ந்து திருப்திப்பட்டதும் கையொப்பமிட்டு அவனை அனுப்பி வைத்தார் அவர்,

இந்தப்பாடசாலையில் அவருக்கு பிடிக்காத விடயமே மாணவர்களின் ராங்கின் படி அடுத்த வருடம் வகுப்பை பிரித்து விடுவது தான். ஏ வகுப்பு எப்போதுமே முதல் தரமாக இருக்கும். டி வகுப்பை சொல்லி வேலையிருக்காது! பல சமயங்களில் அம்மாதிரி வகுப்புக்களுக்கு கற்பிக்கும் ஆசிரியர்களும் ஏனோ தானோ என்று தான் நடந்து கொள்வார்கள்.

இந்த முறையை மாற்ற வேண்டும் என்று அவரும் தான் வந்த நாளில் இருந்து போராடுகிறார். ஸ்டாப் மீட்டிங்கில் இந்த பேச்சு எழுந்ததுமே அர்ஜூனா சண்டை போட்டு வெளிநடப்பு செய்து விடுவது தொடர்கதையானதே தவிர உருப்படியாக எதுவும் நடப்பதில்லை. பெரும்பாலான ஆசிரியர்களே இதுதான் தங்களுக்கு கற்பிக்க வசதியாக இருக்கிறதென்று அவர் சொல்வதை எதிர்ப்பது அர்ஜூனாவுக்கு  கோபத்தை வரவழைக்கும்.

உங்கள் வசதி முக்கியமா? மாணவர்களின் கல்வியும் ஆரோக்கியமான படிக்கும் சூழலும் முக்கியமா?

அந்த கேள்விக்கான பதிலைத்தேட அங்கே எவருக்குமே நேரமில்லை!

அந்த பாடசாலையில் அவருக்கு கிடைத்த பெரிய வகுப்புக்களோடு தனியே ஒட்டிக்கொண்ட பொறுப்பு இந்த ஒன்பதாம் வகுப்பு டி கிளாஸ் பொறுப்பாசிரியர் பதவி. அவர்களுடனான நேரம் அர்ஜூனாவுக்கு தனிபட்ட ரீதியில் பிடித்தமானதொன்று, ஆனால் இப்போது பன்னிரண்டாம் வகுப்பு பரீட்சையை முன்னிட்டு அவர்களோடு அதிக நேரம் செலவிட வேண்டி இருப்பதால் இந்த வகுப்பை கைவிட வேண்டிய நிலை ஏற்பட்டது.

அவருக்குப்பின் ஏனோ தானோவென்று நீண்ட நால் லீவில் நின்று கொண்டிருக்கும் ஒரு ஆசிரியரை பெயருக்கு பொறுப்பாசிரியராக போட்டு வைத்திருக்கிறார்கள். இந்த மாணவர்களோ வகுப்பாசிரியர் இல்லாமல் எல்லாவற்றுக்கும் முன்னாள் வகுப்பாசிரியரான அர்ஜூனாவின் பின்னால் அலைந்து கொண்டிருக்கிறார்கள்.

“வரும்  ஸ்டாப் மீட்டிங்கில் இதற்கு ஒரு வழி பண்ணாமல் விடக்கூடாது! என்ன நினைத்துக்கொண்டிருக்கிறார்கள் எல்லோரும்” அவரின் மனம் கறுவிக்கொண்டது.

ஆனால் அன்று ப்ரீயான இறுதிப்பாடவேளைக்கு ஸ்டாப் ரூமை நோக்கி வந்தவர் தற்செயலாக கேட்க நேர்ந்த வாதமொன்று அந்த பிரச்சனைக்கு  வெகு இலகுவாகவே தீர்வு ஒன்றை அவருக்கு காட்டி விட்டிருந்தது

நான் ஒரு பௌதிகவியல் விஞ்ஞானி பெண்ணே.. பரிசோதனைகள் எனக்கு ரொம்பவும் பிடிக்கும்!

 

Advertisements

19 thoughts on “ஆழி-அர்ஜூனா 5

  1. Hi Ushanthy,
    This update started different with an expectation… Pavithran.. Jimikki.. Murder!! Thrilled to see how Arjuna will pen his story!
    Yazh is incredible! Good to see the story from Arjunas side. Thx

    Liked by 1 person

  2. ஹப்பா !

    இப்படியெல்லாம் கதை வாசிக்க வந்து வந்து எட்டிப் பார்த்திட்டு சென்றதில்லை. முதல் அனுபவம்.

    ஆழி- அர்ஜுனா ஒருவழி பண்ணுறேன் என்றுதான் சொல்லுது..பார்ப்போமே .

    ஹே..ஹே அப்போ நம்ம ஹீரோ ரைட்டர் …பவித்திரன் எப்படிச் செத்திருந்தால் தான் எங்களுக்கு என்ன வந்தது …அவர் இப்படிப்பட்ட கதைகளை உருவாக்குறவர் என்று நாங்க அறிந்ததே போதும். எப்படி ஆரா சமாளிக்கப் போறாள்…?

    ரொமாண்டிக்கா கொலை பற்றி எழுதுறவர் ரொமண்டிக் ஹீரோ ஆவாரா ?

    ஆரா… நிறைய வேலை இருக்கு போல ..ஹ்ம்ம் இந்த அழகில நீ வேற இப்படி விளையாட்டுப் பிள்ளையா இருகிறாய்..

    உஷா …முன்னைய கதைகளை விட பளிச்சென்ற நேர்த்தி …பார்க்க மிகவும் சந்தோசமா இருக்குமா …

    அர்ஜுனா பாத்திரத்தை நீர் வடிவமைத்திருகிற விதம் மிகவும் நன்றாக இருக்கு ..தேவையில்லா அலட்டல் இல்லாத bold ஆனவர், அதுக்கு வலு சேர்க்கும் வயது ..அவர் தொழில் என்று எல்லாம் சேர்ந்து அவரை பளிச்சென்று காட்டுது ..எனக்கு நிறையவே பிடித்திருக்கு .

    அவருக்கு நேர்எதிர்க்குணம் கொண்ட நாயகி …என்றாலும் ஒரு லாயர் அதோடு இப்ப ஆசிரியை …இந்தளவுக்கா இருக்கிறது …

    அவளை அர்ஜுனா கையாளும்விதத்தில் எக்குறையுமே தெரியேல்ல .

    எபிக்கு காத்திருக்கிறேன்

    Liked by 1 person

  3. Update superb usha😍😍😍yazhini pappa so cute avaloda kelvi ennai yosika vaikuthu aduthu scientist enna sothanai vaithirukiraro 😀😀waiting ma

    Liked by 1 person

  4. ஹாய் உஷா நன்றாக இருந்தது பதிவுகள் அனைத்தும் ….அறிமுக பதிவுகளே வித்யாசமாக …..அர்ஜுனா கதாபாத்திரம் மிகவும் அழகாக கொண்டு போறீங்க ….ரோசி உங்கள் கதையைப் பற்றி போட்டதைப் பார்த்துத் தான் படிக்க வந்தேன் ….அடுத்து என்ற எதிர்பார்ப்பை தூண்டிவிட்டது பதிவுகள் …..நன்றி பதிவுகளுக்கு .

    Liked by 1 person

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s