பாஹுபலி

Production: Arka Media Works, Prasad Devineni, Shobu Yarlagadda
Cast: Anushka, Nasser, Prabhaas, Ramya Krishna, Rana Daggubati, Satyaraj, Tamannaah
Direction: S S Rajamouli
Screenplay: S S Rajamouli
Story: Vijayaendra Prasad
Music: M M Keeravaani
Background score: M M Keeravaani
Cinematography: K K Senthil Kumar
Dialogues: Madhan Karky
Art direction: Sabu Cyril

பாகுபலி கதை மிக எளிமையானது. ஊகிக்கக்கூடியதுதான். ஆனால் ராஜமௌலி மாயம் நிகழ்த்திக்காட்டியிருப்பது காட்சியமைப்பில் , அழகியலில், புத்திசாலித்தனமான நகர்வுகளில், செதுக்கப்பட்ட பாத்திரங்களில், இன்னும் சொல்லிக்கொண்டே போகலாம்! மிரட்டலான பல படங்கள் பல மொழிகளில் பார்த்திருந்தாலும் தமிழில் இதுவரை நான் பார்த்ததில்லை. அந்த வாய்ப்பு இன்று அமைந்த போது புல்லரிக்கும் செல்களெல்லாம் நாற்காலி விட்டு எழுந்த புளகாங்கித உணர்வு!

சரித்திரக்கதைகளில் வரும் சங்கால நாடு ஒன்றை கண்முன்னே உயிரோடெழுப்பி நம்மையும் அதில் நடமாடவிட்டு செயற்கைத்தனமே தெரியாமல் ஒன்ற விட்டதற்கு படத்தில் பணி புரிந்த அனைவருக்கும் நன்றிகளும் பாராட்டுகளும்!

மாமன்னன் பல்லாளனுக்கு நூறடியில் ஒரு தகதகக்கும் சிலை திறக்கிற ஏற்பாடுகள் நடக்கின்றன. ஆடல் பாடல் பாரம்பரிய கலைகளென அந்த இடமே அதகலப்படுகிறது. பல்ளாலனும் அவனது தந்தையும் மகனும் பெருமையுடன் மேடையில் வீற்றிருக்கும் போது அவர்களின் இருபத்தைந்து வருடக்கைதியான தேவசேனா சங்கிலியால் பிணைக்கப்பட்டு அந்த காட்சியை காண அங்கே நிறுத்தப்பட்டிருக்கிறாள். நூற்றுக்கணக்கான தொழிலாளர்கள் ஒரு யானை உட்பட அந்த சிலையை கயிறு கொண்டு இழுத்து நிறுத்த முயல்கிறார்கள்! சிலை உயரும் போது பல்லாளன் வாழ்க என்று மக்கள் கோஷம் எழுப்ப வேண்டுமென்று படைவீரர்கள் மக்களை உத்தரவிடுகின்றனர். பிரமாண்ட கட்டுமானத்தந்திரங்களுடன் சிலை மெல்ல எழுகிறது! கொஞ்சம் கொஞ்சமாய்…அப்போது பாவம் ஒரு வயதான மனிதன் களைப்பு மேலீட்டால் சரிந்து விட சிலை மீண்டும் நிலம் நோக்கி சரிகிறது. சவுக்கடி வாங்கினாலும் அவர்களால் மீண்டும் அதை இழுக்க முடியவில்லை. மேலும் சரிகிறது. பிரமாண்ட சிலை கீழே இருக்கும் நூறு பேர் மீது விழுந்து பலி கொள்ளப்போகிறதென்று பதைபதைப்புடன் நிற்க ஒரு வீரனின் கை வடம் தொடுகிறது. ஒற்றை ஆளாய் அதை இழுத்து சமன் செய்து தடுமாறியவர்கள் கையில் கொடுத்து கீழே இருந்த மனிதனை தூக்கி விட்டு குறும்புப்புன்னகையோடு அவன் அவ்விடம் விட்டு அகல்கிறான். அந்த வீரனின் முகம் கண்டவனோ பாகுபலி என்று உச்சரிக்க தொடர்ந்த சில நிமிடங்களில் அந்த இடமே பாகுபலி என்ற கோஷத்தால் அதிர்கிறது. அந்த பெயர் செய்த மாயம் உற்சாக அலையை அவர்களிடம் ஊட்டி வெகு வேகமாய் சிலையை தூக்கி நிறுத்த வைக்கிறது. அந்த பாகுபலி பல்லாளனின் விரோதியும் அவனாலே அழிக்கப்பட்டவனும் ஆவான். அவன் பெயர் சொல்லி கோஷமிட்டபடியே பல்லாளனின் சிலை எழுவது ஏதோ அவனே வந்து இவனை தூக்கி நிறுத்தியது போல பல்லாளன் அவமானத்தில் குறுக பெருமித சிரிப்பை சிந்துகிறாள் தேவசேனா! நூறடி பல்லாளன் சிலையை விட வானுயர வளர்ந்து நிற்கிறது பாகுபலி உருவம்! இந்தக்காட்சி ஒன்றே போதும் மக்களே படத்தின் பெருமை சொல்ல! காட்சிக்கு தேவையான பிரமாண்டமும் இசையும் புத்திசாலித்தனமும், ஆங்காங்கே குறியீட்டுக்காட்சிகளுமாய் ஒவ்வொரு காட்சியையும் இழைத்திருக்கிறார் ராஜமௌலி!

முதுகில் அம்புடன் நீர்வீழ்ச்சி அருகில் ரம்யா கிருஷ்ணன் வரும் முதல் காட்சியிலேயே நம் கண்களையும் சிந்தனையையும் குத்தகைக்கு எடுத்துக்கொண்டு விடும் இயக்குனர் இறுதிக்காட்சி வரை திருப்பித்தரவே இல்லை! அந்த நீர்வீழ்ச்சி ஹப்பா!!! திரையில் பார்த்தால் மட்டுமே புரிந்து கொள்ள முடியும் மக்களே!

ரம்யா குழந்தையை சிவனிடம் ஒப்படைத்து விட்டு உயிர்துறக்க குழந்தை இல்லாத சங்கா கையில் அது சேர்கிறது.தன் குழந்தையாய் எண்ணி சிவு(பிரபாஸ்) என பெயர் சூட்டி வளர்க்க ஆரம்பிக்கிறாள் சங்கா. அந்த குழந்தையோ அந்த நீர்வீழ்ச்சி மலையை ஏறி மறுபுறம் செல்ல குழந்தையிலிருந்தே துடிக்கிறது ஆனாலும் தொடர் தோல்விகள்! நீர்வீழ்ச்சி மலையை சிவனால் மட்டுமே ஏற முடியும் என மக்கள் நினைக்கிறார்கள்! அந்த குழந்தை கொஞ்சம் அசாதாரணமான பலத்துடன் விளங்குகிறான். விடா முயற்சியுடன் முயல்கிறான். குறும்புச்சிரிப்பும் , கண்களுமாய் ஆண்களை பொறாமை கொள்ளவைக்கும் உடற்கட்டுடன் அச்சொட்டாய் அந்த பாத்திரத்தோடு பொருந்திப்போகிறார் பிரபாஸ்!

தாயின் வேண்டுதலை இலகுவாக்க சிவு பிரமாண்ட சிவலிங்கத்தை பெயர்த்து எடுத்து சென்று அவருக்கு நீரபிஷேகம் கிடைத்துக்கொண்டே இருக்குமாறு அந்த நீர்வீழ்ச்சியின் கீழே வைக்க அங்கே தொடங்குகிறது சிவனின் ஆட்டம்! பிரபாஸ் அதை பெயர்த்து எடுத்து தோளில் வைத்து நடக்கும் போது வரும் “சிவ சிவாய போற்றியே” என்று தொடங்கும் பாடல் வரிகளும் இசையும் புல்லரிக்கும் ரகம்! வரிகள் அற்புதம்! சிவலிங்கமே தன்னை சுமந்து செல்கிறதே என்பதாக செல்லும்!

“கங்கையை தான் தேடிக்கிட்டு
தன்னைத்தானே சுமந்துகிட்டு
லிங்கம் நடந்து போகுதே!”

சிவலிங்கத்தை வைக்கும் போது ஒரு பெண்ணின் முகமூடி ஒன்று சிவுவை சேர்க்கிறது. அந்தப்பெண் வெள்ளையுடையில் தேவதையாய் வந்து ஏறும் வழி காட்ட சிவு அவளை நோக்கி செல்வது போல் கொஞ்சம் கொஞ்சமாய் ஏறி அந்த மலையை ஏறி விடுகிறான்! அந்த மலையை ஏறும் காட்சிகள் கிராபிக்ஸ் கலக்கல்! பின்னணியிசையோடு காட்சிகள் சேரும் போது எத்தனை தடவைகள் புல் மட்டுமல்ல மரமே அரித்தது என்று எனக்கு நினைவில்லை!

மலையின் மறுபுறம் மகிழ்மதி என்ற நாடு! சிவு உள்ளே நுழைந்ததுமே அவன் கண்ட தேவதையை அவந்திகா என்ற போராளியாக கண்டு அதிர்கிறான். வீரமும் தேவசேனாவை மீட்கும் இலட்சிய வெறியில் சிவந்த கண்களுமாய் தமன்னா தன் பாத்திரத்துக்கு நியாயம் செய்திருக்கிறார்! ஆனால் தலைவர் அழைக்கும் போதும் வீரமாக நடக்கும் போதும் அவர் நடந்து வரும் முறை கம்பீரத்துக்கு பதில் கொஞ்சம் காமடியாக இருந்தது உண்மை! தமன்னாவை இவ்வளவு அழகு என்று எனக்கு இன்று தான் புரிந்தது! தேவதையே தான்!

பிரபாஸ் தமன்னாவுக்கு தெரியாமல் உள்ளங்கையில் தண்ணீருக்குள் வந்து வரைவதும் பாம்பின் துணையோடு தோளில் வரைவதுமென அந்த இரு காட்சிகளும் இன்னும் கண்ணிலேயே நிற்கின்றன. ரொமான்ஸ் பிரியர்கள் மிக ரசிப்பார்கள்! என்ன தான் கோபமாய் கொல்ல வந்தாலும் ஹீரோ அவரை பெண்ணென உணரவைத்ததும் அவரும் காதலில் விழ அங்கே டூயட் உதயமாகிறது. இந்தபாடலின் அழகியல் கண்களை கவர்ந்த அளவுக்கு பாடலின் இசை கவரவில்லை. மனதில் நிற்கவும் இல்லை. படத்தின் ஒரே ஒரு ரொமான்ஸ் பாடல் அவ்வளவாக எடுபடாமல் போனது ஏமாற்றமே!

அதன் பின்னர் வரும் பனிப்புயல்! அதுவும் பிரபாஸ் பாறையை தோணிபோல் பெயர்த்தெடுத்து அதிலேறித்தப்பிப்பது கிராபிக்ஸ் மிரட்டல்!

தேவசேனாவை மீட்பதை தன் பொறுப்பாக்கிக்கொண்ட சிவு மாளிகைக்கு செல்ல அங்கே வீரசாகசங்கள் செய்து அனுஷ்காவை மீட்டு விடுகிறார். வரும் வழியில் பல்லாளனின் மகனிடம் சிக்கி அனுஷ்கா தாக்கப்பட பொங்கியெழுந்த சிவு அனைவரையும் துவம்சம் செய்கிறான்.

இந்த இடத்தில் சத்யராஜ் பற்றி சொல்லியே ஆகவேண்டும்! ராஜ அடிமை கட்டப்பாவாக சும்மா வாழ்ந்திருக்கிறார் மனுஷன். அடிமையாய் இருந்தாலும் கம்பீரமும் அந்த கட்டுமஸ்தான உடலும் செம்ம! கண்களே பாதி நேரங்களில் நடித்து முடிக்கிறது. சுதீப் கவுரவ வேடம் போல வந்து போனார்! அநேகமாக இரண்டாம் பாகத்தில் வரக்கூடும் என்று எண்ணுகிறேன்.
கட்டப்பா சிவுவை தாக்க வருகையில் அவன் முகத்தை கண்டு பாகுபலி என்று வணங்க அனைவரும் அதிர்ந்து அவனை வணங்க குழம்பி நிற்கும் சிவுவுக்கு கதை சொல்வதாய் ப்ளாஷ் பக் விரிகிறது!

ரம்யாக்கிருஷ்ணன் நாசர் மகன் ராணாவும் இறந்துபோன அரசர் மகன் பாகுபலி பிரபாசும் அடுத்த அரச பீடத்துக்கு உரியவர்களாய் நிற்க அவர்கள் வளர்ந்ததும் யாருக்கு தகுதியும் மக்கள் மன ஆதரவும் கிடைக்கிறதோ அவனே மன்னன் என்று சிவகாமி சொல்லி விடுகிறார்! யாருக்கு இறுதியில் மகிழ்மதியின் அரசுக்கட்டில் ஏற முடிந்தது என்பதே பாகுபலி!

சிவகாமியாக ரம்யாகிருஷ்ணன்! அழகும் கம்பீரமும் நேர்மையும் கொண்ட வீரப்பெண்மணியாய் நெஞ்சில் நிற்கிறார். அவர் குரல் இன்னொரு மடங்கு கம்பீரம் தருகிறது. சேலையை நிலத்தில் தளையவிட்டு அவர் நடந்து வரும் காட்சி, இரண்டு குழந்தைகளையும் மடியில் வைத்துக்கொண்டு கால் மடக்கிக்கொண்டு அரியாசனத்தில் அமர்ந்திருக்கும் காட்சி, வாள்வீசி எதிரிகளை வீழ்த்தும் காட்சி என அந்த பாத்திரப்படைப்பு பிரமாதம்!

ராணா! வயதான முகமும் மிரட்டும் உடலுடனும் காட்டெருமையை கொல்லும் முதல் காட்சியிலேயே தன் இயல்பை புரியவைத்து விடுகிறார். முரட்டுத்தனமும் அசாத்திய உடலுமாய் பீமன் உடலில் துரியோதனன் ஆவி புகுந்தால் இப்படித்தான் இருக்குமோ என்று எண்ண வைத்து விட்டார். தேவசேனையிடம் வஞ்சமாய் பேசுமிடத்திலும் காவலர்களிடம் பேசும் போதும் ஒரு கொடுங்கோல் மன்னனை கண்ணில் காட்டினார். கிடைத்த வாய்ப்புக்களில் மிரட்டியிருக்கிறார்!

அமரேந்திர பாகுபலியாய் இன்னொரு வேடத்தில் நம்மை கொள்ளை கொள்கிறார் டார்லிங். நடிப்பிலும் நிறைவே! மக்களை காக்கும் மன்னனாய் அன்புடன் வந்தாலும் அரண்மனை பெண்களின் உள்ளங்கவர் கள்வன்! அழகான கனவு மன்னன்! பிரபாசைத்தவிர வேறு யாரையும் பொருத்திப்பார்க்கவே முடியாது இந்த பாகுபலிக்கு! டார்லிங்கின் ரசிகைகள் எண்ணிக்கை எகிறப்போகிறது!

அனுஷ்கா!!! இந்தப்பாகத்தில் அனுஷ்கா வாய்திறந்து பேசுமிடம் இரண்டே இரண்டு தான். வயோதிப தோற்றத்தில் இருபத்தைந்து வருடமாய் சிறை வைக்கப்பட்டிருக்கும் தேவசேனாவாக நடித்திருந்தார். ஆனாலும் மகனை காண நம்பிக்கையோடு காத்திருந்து மகனை கண்டதும் தவிப்பும் உற்சாகமுமாம் ஆவலோடு இருப்பதும் அவனை தொட தவிப்பதுமாய் கிடைத்த இடங்களில் சிக்சர் அடித்து விடுகிறார்! இரண்டாம் பாகத்தில் அனுவை காண காத்திருக்கிறது கண்கள்!

நாசர். சூம்பிய விரல்களோடு ராணாவின் தந்தையாக வருகிறார். மகனுக்கு அரசுப்பதவி கிடைக்க கபடமாய் முயலும் மனிதர். பெரிதாக நடிக்கும் வாய்ப்பு அவருக்கும் இந்தப்பாகத்தில் இல்லை.

இறுதியாய் நான் படத்தில் வாய்பிளந்து பார்த்த காட்சியை பற்றி சொல்லி விடுகிறேன். அந்த இறுதி யுத்தக்காட்சி! என்ன ஒரு கற்பனை ராஜமௌலி சார்! அத்தனை நுணுக்கம்! பிரமாண்டம்! திரிகோண வியூகம் பிரமாதம்!! அம்புகள் பறப்பதும் கதாயுதங்கள் வாள்கள் ரத்தம் குதிரைகள் என தத்ரூபமான போர்க்காட்சி அது! மக்களே நன்றாக விழித்திருந்து அந்த காட்சியை மட்டுமாவது ரசித்துப்பாருங்கள்! அந்த கறுப்பு காட்டுமிராண்டி போன்ற மக்கள் தலைவனின் உடல்மொழியே பயங்கரம்! இதில் அவர்கள் புதிதாக ஒரு மொழி பேசிக்கொண்டு வருகிறார்கள்!

மதன் கார்க்கி அது தான் புதிதாக உருவாக்கிய கிளிக்கி என்ற மொழி என்றும் இலக்கண விதிகள் எல்லாம் எழுதி இருப்பதாகவும் ஒரு பேட்டியில் சொன்னார். ஆனால் முதல் முறை அதை பேசிக்கேட்க சிரிப்பு வந்து விடுகிறது! பீட்சா என்றெல்லாம் காதுகளில் விழுகிறது! ஆனால் போகப்போக அந்த தலைவன் கிளிக்கியை உடல்மொழியோடு பேசப்பேச பொருத்தமாய் தான் இருக்கிறது!

படத்தில் கிராபிக்ஸ் காட்சிகளுக்கும் உண்மை காட்சிகளுக்கும் வேறுபாடே தெரியவில்லை. மகிழ்மதிப்பேரரசு கண்களுக்குள்ளேயே நிற்கிறது!

படத்துக்கு இசை ராஜமௌலியின் ஆஸ்தான கீரவாணி. பின்னணி இசை மிரட்டிய அளவுக்கு பாடல்கள் மிரட்டவில்லை. மதன் கார்க்கியின் வசனம் நாடகத்தனமாக இல்லாமல் நறுக்குத் தெறிக்கிறது! பாடல் வரிகளும் நன்றாகவே இருந்தன.

திரையரங்கில் இருந்த ரசிகர்களின் பொதுவான கருத்து பிரபாஸ் தெலுங்குப்பட ஹீரோக்கள் போல நம்பவே இயலாத சாகசங்களை செய்கிறார் என்பது! ஆனால் எனக்கு அது தவறாக தெரியவில்லை. ஆரம்பத்திலிருந்தே அந்த கதாப்பாத்திரம் அதிக பலசாலி என்று இயக்குனர் தெளிவாகவே காட்டுகிறார் அத்தோடு ஒரு இளவரசன் எனும் போது கொஞ்சம் மிகை தேவையே. நம் வந்தியத்தேவன் செய்யாத சாகசங்களா என்ன?

முடிசூட்டுதலோடு கதையை முடிக்காமல் அடுத்த பாகத்துக்கான லீடையும் கொடுத்து முடித்தது ரசிகர்கள் மனதில் கொஞ்சம் முழுமை பெறாத உணர்வை கொடுத்து விட்டதோ என்றும் ஒரு லேசான ஐயம் எனக்கு!

இரண்டாம் பாகத்தில் தான் படத்தின் கதையே இருக்கிறது என்பது உறுதியாய் தெரிகிறது! இந்தப்பாகம் ஒரு முன்னோட்டம் போலத்தான் இருக்கிறது! இரண்டு மணிகளுக்கு மேலேயும் படம் ஓடினாலும் அடுத்த பார்ட் எப்போப்பா என்று ஏக்கத்துடன் எழுந்து செல்லும் ரசிகர்கள் நிச்சயமாய் ராஜமௌலியின் வெற்றியே!
இப்படி ஒரு படத்தை சாதித்து காட்டு காட்டென்று காட்டியதற்கு ஒட்டுமொத்த படக்குழுவிற்கும் பாராட்டுக்களும் வாழ்த்துக்களும்!! அடுத்த பாகத்துக்கான காத்திருப்பு இப்போதிலிருந்தே!!!!!!!!!!

பிடித்த பாடல்கள்

இருள் கொண்ட வானில் .. காட்சிப்படுத்தலும் வரிகளும் பெண் குரலும் ஏதோ செய்யும்!

தீரனே… பிரபாஸ் மலை ஏறும் போது தமன்னா தேவதையாய் வரும் இடம்! அந்த துள்ளல் இசைக்காக!

கட்டாயம் பார்த்து விடுங்கள் மக்களே! பெரிய அலசலாய் போனாலும் குறைத்து சொல்ல மனம் இடம் தரவில்லை.. நன்றி நன்றி நன்றி மீண்டும் இன்னொரு விமர்சனத்துடன்

Advertisements

மாஸ்


Director : Venkat Prabu
Leading cast: Surya, Nayanthara, Premjee, Praneetha, R.Parthiban, Samudrakani
Music Director : Yuvan Shankar Raja

ஹாய் ஹாய்!

முதலில் கதை சுருக்கத்தை சொல்லிடறேன்!

மாசும்(சூர்யா) ஜெட்டும்(பிரேம்ஜி) உயிர் நண்பர்கள்! அத்தோடு டிசைன் டிசைனாக திட்டம் போட்டு திருடும் கில்லாடி திருடர்கள்!. நயன் நர்சாக வருது, அதை கண்டதும் சூர்யாக்கு காதல் வருது!!!! வெள்ளையுடையில் சர்ச் வாசலில் நயனை பார்த்ததும் நமக்கும் தாங்க! ஹி ஹி

ஆனாப்பாருங்க! திருடப்போன இடத்துல ரெட்டியா அவன் என்ன ரொட்டியான்னு கேட்டுட்டே ஒரு ரவுடி கூட பிரச்சனைல மாசும் ஜெட்டும் மாட்டிக்கிறாங்க! அதே நேரம் நம்ம நயன் ஹெட் நர்ஸ் ஆகணும்னா மூணு லட்சம் தரணும்னு தலைமையதிகாரி பரமானந்தம் சொல்லிடறார்! “நீயும் நானும் ஒன்னு தின்னும் பாரு பன்னு” என்று தானே மூன்று லட்சம் கொடுப்பதாக சூர்யா சொல்றார், அப்படியே ப்ரோபோசம் பண்றார். ஆனால் விதி வலியது! வழில ரெண்டு பேரும் ரெட்டி ஆட்கள் கிட்ட மாட்டிக்க சேசிங் துரத்தல்கள் என்று அவ்வளவு நேரமும் தூங்கிய திரைக்கதை சோம்பல் முறிக்கிறது!! அப்போ பாருங்க படார்னு நேரெதிரா இன்னொரு வாகனத்தோடு மோதி மாசும் ஜெட்டும் போன கார் கரப்பான் பூச்சியாய் கவிழ்ந்துடுது!

அதனுடன் தான் உண்மையில் படம் ஆரம்பிக்கிறது. அதுவரை நீங்கள் தூங்காமல் இருப்பதற்காக கத்தி தீம் மியூசிக் , மாலினி ஐ ஆம் கிருஷ்ணன் இப்படி பழைய படங்களின் சீன்கள், வசனங்களை லொள்ளு சபா இபெக்டில் போட்டு நிரப்புகிறார் வெங்கட் பிரபு. ஆனாலும் மக்கள் ரசிக்கிறார்கள்.

அப்புறம் தான் மெயின் ஸ்டோரி வருது.

ஆக்சிடேண்டோட நம் மாசுக்கு பேய்களை பார்க்கற சக்தி வந்துடுது. ஸ்ரீமன், கருணாஸ் என்று ஆறேழு பேய்கள் அவரை துரத்தி வருகின்றன, தங்கள் நிறைவேறாத ஆசையை நிறைவேற்றி வைக்கும் படி ரிக்வெஸ்ட் பண்ணிட்டு! மாசும் முதலில் பயந்து ஓடிவிட்டு பிறகு அவற்றை வைத்து சம்பாதிக்க ஆரம்பிக்கிறார்.
அப்படி ஒரு சந்தர்ப்பத்தில் தான் மற்ற சூர்யா (ஷக்தி)என்ட்ரி கொடுக்கிறார். அவரை முதல் முறை பார்க்கும் போது கண்ணாடி முன் நின்று மாஸ் செய்யும் அலம்பல் செம்ம! என்னம்மா நீங்க இப்டி பண்றீங்களேம்மா! ஹா ஹா

சும்மா சொல்லக்கூடாது. ஷக்தியாக வரும் சூர்யாவை பார்த்ததுமே நான் பிளாட்டு! twilight பார்த்திருப்பீங்களே! அதுல நம்ம எட்வர்ட் காலனையும் வோல்டூரி ஆரோவையும் சேர்த்து செய்தது போல பர்ஸ்ட்கிளாஸ் மேக்கப், மானரிசம் என்று தூள் கிளப்புகிறார். அநியாயத்துக்கு அழகாக இருக்கிறார்! இவர் யார்? இவரை மாசை வைத்து செய்யும் பகீர் வேலைகள் என்ன? பிரேம்ஜிக்கு என்ன ஆனது? இதைல்லாம் பரபரவென்ற திரைக்கதையில் சொல்லியிருக்கார் வெங்கட்! இரண்டாம் பாதி ரொம்ப நல்லா இருக்கு.

யுவன் சார்.. என்னம்மா இப்டி பண்றீங்களேம்மா? முடியல.. கத்தி தீமை எவ்வளவு இடத்துல தான் போடுவீங்க? ஆவிகளோட ஆத்மா சாந்தியடையும் இடத்துல பிட்டு பிட்டா வந்த வைக்கோம் விஜயலக்ஷ்மி பாட்டு மட்டும் டச்சிங். ஆனா அதுவும் மறந்து போச்சு!

இரண்டு கதாப்பாத்திரத்துக்கும் உடல் மொழியில் மாறுபாடு காட்டி நன்றாக செய்துள்ளார் சூர்யா. நயன் பாவம்! கடைசில வந்து மாசுக்கு மருந்து மட்டும் கட்டுது. என்ன செய்வது ஒரு ஹீரோ இருந்தாலே ஹீரோயினுக்கு நடிக்க வாய்ப்பு கிடைக்காது. இதில் இரண்டு அதிலும் ஒன்று பேய் வேறு! ஹீரோயினுக்கு எப்படி சான்ஸ் இருக்கும்? பாவம்! L ப்ரனிதா சக்திக்கு ஜோடி, பாரின் பொண்ணு. பிரெஷ்ஷா இருக்காங்க! ஷக்தி சூர்யா, பிரணிதா, மகள் மேகா வரும் காட்சிகள் கொள்ளை அழகு!

நம்ம கோஸ்ட் கோபால் வர்மா ராஜேந்திரன் கூட அங்கங்கே கிச்சு கிச்சு மூட்டுறார். பரமானந்தம் கொடுத்த ஸ்பேஸ்ல அழகா ஸ்கோர் பண்றார். ஜெய் கூட வந்து போனார், வழக்கம் போல கியூட்டா! மத்தவர் பார்த்திபன் ! தல கலக்கிட்டார். அவருக்கே உரிய நக்கல் நையாண்டி என செகண்ட் ஹால்ப்பை தூக்கி பிடிக்கிரவங்கள்ள இவரும் ஒருத்தர். பிரேம்ஜி.படம் முழுக்க மாஸ் கூட வர்றார். இந்த படத்தில் தான் எனக்கு இவரை பார்த்து எரிச்சல் வரவில்லை. கொஞ்சம் பாவமாகவும் இருந்துது.

சமுத்ரக்கனி சார். நல்லாத்தானே போயிட்டிருந்துது? வில்லன் ரோல். சாலேஞ்சிங் ரோல்னா உடனே போயிடறதா? ஒரு பயங்கரமான வழக்கமான வில்லன். லுக் மட்டும் கிளாசா இருக்குது!

நயனோட டிரஸ் அந்த பார்ஸ்ட்ல வர்ற வெள்ளை சுடி தவிர நல்லா இல்ல, மேக்கப் கூட! மேக்கப் வுமனை நல்லா மொத்துங்க மேடம்!

மொத்தத்தில் மிகப்பெரிய திறமையான நடிகர் பட்டாளம், சூப்பரான கான்செப்ட் என்ற இரண்டு மிகப்பெரும் பலம் இருக்கும் போதும் வெங்கட் படத்தை கமர்ஷியல் பேய் மசாலாவில் முக்கியெடுத்து தந்து விட்டார். இருந்தும் நன்றாகவே இருந்தது!

டைரக்டரிடம் சில கேள்விகள்!

சார். இவ்ளோ லூக்கா, ஹோலிவூட்கு சவால் விடுறது போலவே இருக்கற நடிகரை வைச்சு ராகவா லோரன்ஸ் லெவெல்ல பேய் கான்செப்ட் மட்டும் தான் ஞாபகம் வருதா? அதுவும் அதே வழக்கமான பழி வாங்கும் கதை! ஏன் வித்யாசமான கான்செப்ட் கொடுத்தா நாங்க பார்க்க மாட்டோமா? ரசிகர்களை தயவு பண்ணி அண்டரெஸ்டிமேட் பண்ணாதீங்க சார்

ஷக்தி சூர்யாக்கு எதுக்கு சிலோன் பெயின்ட்? இந்த கதைக்கு சாதாரண வெளிநாட்டுத்தமிழனே போதுமே? யூ டூ வெங்கட்? பரவாயில்லை. அந்த காரக்டரை அப்படி சூப்பரா டிசைன் பண்ணதுக்காக மன்னிச்சு விட்டுர்றேன்! எங்க ஸ்லாங்கை கிட்டத்தட்ட பேசியதற்காக சூர்யாவுக்கும் ஒரு பொக்கே!

மத்த பேய்கள் ஸ்ரீமன் கருணாஸ் எல்லாம் ஆத்மாஷாந்தி அடைஞ்சதுக்கப்புறமும் திரும்ப வந்து மாசுக்கு ஹெல்ப் பண்றாங்களே. ஷக்தி வைப் பிரணிதா மட்டும் எதுக்கு வரலை? அவங்க கைக்குழந்தையை இல்ல விட்டுட்டு போயிருக்காங்க? அவங்க தானே முதல் ஆளா வந்துருக்கணும்? ஷக்தி மட்டும் தான் வருவாரா? இல்லை சொர்க்கத்துலயும் ஜெண்டர் பாலன்ஸ் இல்லையா? ஹி ஹி டவுட்டு!

சத்தியமா மாசை பார்த்தா பாவமா இருந்திச்சு. ஷக்தி இவ்ளோ யங்கா ஹான்ட்சமா இருக்கார் செத்துப்போனதால. நம்ம மாஸ் தாத்தாவாகி செத்துப்போனா அவர் தாத்தா போல தானே ஆவியா இருப்பாரு. அப்போ சீக்கிரமே செத்துட்டா யங்காவே இருந்திடலாம்னு ! ஹி ஹி

கடைசி சீன்ல சக்தி ஆத்மா ஷாந்தி ஆகி வைப்பையும் பொண்ணு கூடவும் கைகோர்த்து நடக்கறார். அநியாயத்துக்கு எட்வர்ட் பெல்லா, ரேனேஸ்மி ஞாபகம் வருது. கொள்ளை அழகு!

படம் நல்லாருக்கா இல்லையா? இவ என்ன சொல்ல வர்றான்னே புரியலையேன்னு நினைக்கிறீங்களா? ஆக்சிடெண்ட் சீன் வரும் வரையான அரைமணி /முக்கால் மணி நேரம் முடியல, அப்புறம் நிறைய லாஜிக் மிஸ்டேக்குகள் ஆனால் எல்லாத்தையும் தாண்டி ஒருதடவை ஜாலியா ரசிக்கலாம். தைரியமா பாருங்க!

பத்து எண்றதுக்குள்ள

படம் பார்க்க போலாம் வா வான்னு தம்பியும் என் வீட்டுக்காரரும் சேர்ந்து வருந்தி அழைச்சப்போவே நான் அலர்ட் ஆகியிருக்கணும்! என்ன பண்றது? விதி வலியது! பயபுள்ள இருபது வருஷ கோபத்தையும் காமிச்சிட்டான்! மக்களே இப்படி ஓபனாவே சொல்றேனேன்னு குழம்பறீங்களா? அந்தளவு நொந்து போய் வந்திருக்கேன் மக்கா! வெகு சராசரி ரசிகையான என் பார்வைல படத்தை பற்றி சொல்றேன். எப்படியிருக்குன்னு பார்த்துரலாமா?

உத்தரகண்ட்ல ஒரு கிராமம், அங்கே ஜாதி குறைஞ்ச மக்கள் நாற்பது பேரை வெட்டிடறாங்க அந்த இன்சிடென்ட் தான் பர்ஸ்ட் சீனே. ஆனா இந்த இன்சிடெண்டோட தான் மீதியை கனெக்ட் பண்ணப்போறேன்னோ/ ஹீரோவுக்கும் ஹீரோயினுக்கும் பசுபதிக்கும் இதுல எந்த கனெக்ஷனும் இல்லை என்று சொல்லவோ/இல்லை தனக்கே ரிமைன்ட் பண்ணிக்கவோ படத்துல இந்த நியூசை பல தடவை பலர் படிக்கற போல டைரக்டர் சீன் வச்சுருக்கார்! அதுனாலயே டேய் இங்கே நின்னு டைம் வேஸ்ட் பண்ணாம சீக்கிரம் நோர்த் இந்தியாலக்கு அதாவது கதைக்கு போங்கடான்னு நாங்க டெண்ஷனாகறோம்!

படத்துல விக்ரம் கார் ஓட்டறவரா வர்றார். அவர் எல்லாத்தையுமே பத்து எண்றதுக்குள்ள முடிச்சிருவார். அவருக்கு பேரே கிடையாது! BOND பேர்ல தான் நெறைய நேரம் வர்றார். ரொம்ப வீரமான தீரமான சாகசம் பண்ற ஆளு! படத்துல அவரோட காரக்டர் ஸ்கெட்ச் இதுதான்! விக்ரமோட ஓபனிங் சீன் வரும் பாருங்க! ஸ்பீட் படத்துல ஒரு உடைஞ்ச பிரிட்ஜை பஸ் தாண்டணும்னு எவ்ளோ நேரம் பிளான் போடுவாங்க! அங்கே நம்ம Bond ஐ விட்டிருந்தா அசால்டா பஸ்ஸை ரெண்டு தரம் பல்டி அடிச்சு டிரைவர் சீட்ல இருந்து கீழே பாய்ஞ்சு பாமை தூக்கி வீசிட்டு பத்து செக்கன்ல மேல வந்துருப்பார்! அப்படியொரு ஓபனிங்! சப்பான்னு நான் இருக்க என் பக்கத்துல இருந்தவர் புண்ணியம் தேடி காசிக்கு போனோம்னு கண்ணு தெரியாத விக்ரமா ஆக்ஷன் போட்டுட்டு இருந்தார்! ஹா ஹா ஆனா ஒண்ணு சொல்லியே ஆகணும் மனுஷன் செம்ம யூத்தா அழகா இருக்கார்! பணத்துக்காக ஸ்மக்ளிங் பண்ணற பசுபதி காங்குக்கு அப்பப்போ ஹெல்ப் பண்ணறார். ஏன் எதுக்கு என்றதெல்லாம் படத்துல பாருங்கே!!!

சமந்தா!!! இவங்க படத்துல மென்டலா நடிக்கிறாங்க. ஆனா அந்த விஷயம் டைரக்டருக்கு தெரியாது! அனேகமாக சமந்தாக்கே தெரியாதுன்னு நினைக்கிறேன்! அவங்க என்னவோ ஜெனிலியான்னு நினைச்சு நடிக்க நமக்கு ஐயோ பாவம் யார் பெத்த புள்ளையோன்னு பீலிங் ஆகுது! பட் சமந்தாவும் செம கியூட்டா அழகா இருக்காங்க. அப்பியறன்ஸ்ல மட்டும்! ஹாஸ்டல்ல தங்கிருக்கற இவங்க வாழ்க்கையை ஜாலியா அனுபவிச்சு வாழ்றாய்ங்களாம்! நான் சொல்லலைங்க! அவங்களே சொல்லிக்கிராய்ங்க! டிரைவிங் எக்சாம்ல பதினாலு தடவை பெயில் ஆகி அடுத்த தடவை விக்ரம் கிட்ட கத்துக்க வர்றாங்க. ஏற்கனவே ரெண்டு மூணு பார்வைக்கு பிறகு இது மூலம் அவங்க அறிமுகம் ஆகறாங்க!

இப்படியா அவங்க வாழ்க்கை போயிட்டு இருந்தப்போ அங்கே ஒரு வில்லன் பூரான் சிங், கடத்தல் தொழில் தான் அவரும் சும்மா அசால்டா பாஷா பில்டப்போட சாருக்கு ஒரு கட்டை விரல் பார்சல்னு அமோகமா டெசர்ட் பாக்ரவுன்ட்ல வாழ்றார்! அவர் ஒரு நாள் சமந்தா பிக்ஸ்ரை பசுபதிக்கு ஈமெயில் பண்ணி இவளை தூக்குன்றார்!!! அயய்யோ இது அவ்ளோ வர்த் இல்லிங்கண்ணான்னு மறுபடியும் என் பக்கத்துல சவுண்டு! ஹா ஹா

இப்படி இவங்க சமந்தாவை கடத்துனதும் அவரை நார்த் இந்தியா கொண்டு போய் சேர்க்கற பொறுப்பு எப்படியோ விக்ரம் கிட்ட வருது! ஆனா தான் ஓட்டிட்டு போற கார்ல பின்னாடி சமந்தா மயக்கத்துல இருக்கு என்றதும் அது தான் அவங்க கிட்ட சேர்க்கப்போற பொருள் என்றதும் தெரியாம அப்பாவியா இருக்காரு! இவ்ளோ நாளும் கடமை கண்ணியம் கட்டுப்பாடு என்று எல்லாத்தையும் சரியா கொண்டு போய் சேர்த்தவர் நிறைய பணத்துக்கு ஒத்துக்கிட்ட ப்ராஜெக்ட்டை சும்மா அப்படியே ரோட்ல விட்டுட்டு சார்மி கூட குத்து டான்ஸ் ஆட அதுல இன்னொரு ராக் கும்பல் உள்ள பூந்து சமந்தாவை கடத்த அவங்க முழிச்சு விக்ரம்கிட்ட ஓடி வர கடத்துனவனே காப்பாத்துறானேன்னு எல்லாரும் குழம்பறாங்க! ஒரு வழியா அவருக்கு விஷயம் தெரிஞ்சும் அவரு சமந்தாவை கூட்டிட்டு போய் பூரான் சிங்கை காலால நசுக்கி தூக்கி போடறார்! அப்போ அந்த பூரான், அயையோ நான் வெறும் பூரான் கடத்த சொன்னது ஒரு தேளுன்னு சொல்றார்! இவரும் தேளை தேடி போறார்! என்ன பிரச்சனைன்னு தெரிஞ்சு அங்கேயே முடிக்கணுமாம்! ஆனா பாருங்க இந்த தேளுக்கும் செம பில்டப்! ஸ்கார்ப்பியன் கிங் ரேஞ்ல! துப்பாக்கியால அப்படி சுடுவாராம்! ஆனா பாவம் தேளு மட்டுமில்லை தேளோட குட்டிங்க கூட விக்ரம் கிட்ட துப்பாக்கி யூஸ் பண்ணாம ஒண்ணு ரெண்டு கத்துக்கிறாங்க!!! எவ்ளோ தலை போற பிரச்சனைன்னாலும் சுட வந்த விக்டிம் ரெண்டு செக்கன் வெயிட் பண்ண சொன்னதும் சரிடா குட்டிம்மான்னு வெயிட் பண்றாங்க! டேய்!!! இப்போ நீ சுடலன்னா நான் வந்து சுட்டுருவேண்டான்னு நான் கடுப்பாயிட்டேன்!

ஒகே அந்த ஸ்கார்ப்பியன் கிங் யாரு? சமந்தா யாரு? எதுக்கு கடத்தினாங்க? அவங்களை என்ன பண்ணப்போறாங்க? விக்ரம் என்ன பண்ணப்போறார் இது தான் கதை! அதை நான் ரிவில் பண்ணல.

ஆனா இதை சொல்லலைன்னா என் தலையே வெடிச்சிரும்! படத்துல இன்னொரு சமந்தா இருக்காங்க! வில்லி! ஹையோ ஹையோ! வாயை லைட்டா சுழிச்சுக்க, வில்லியாயிடலாம்னு பாவம் புள்ளைக்கு யாரோ ஒரு எட்டப்பன் சொல்லிக்கொடுக்க பச்சப்புள்ள பாவம் வாயையும் சுழிச்சிட்டு லைட்டா கண்ணையும் தலையையும் ஒரு மார்க்கமா திருப்பி நடிச்சிருக்கு! இம்ப்ரோவைஸ்??? மிடில மக்கா!!!! இதுவரைக்கும் சமந்தா ஒரு நல்ல ஆக்ட்ரஸ்னு நான் நினைச்சேன். அஞ்சான் படத்துக்கு பிறகு யாரோ சூனியம் வச்ச ரேஞ்ச்லயே வருது! அழகான ஆக்ட்ரஸ்! கேப்பபிளிட்டி இருக்கு ஆனா வை மா இப்டி????????? பாவம் இது சமந்தா குற்றம் இல்லை! டுவல் ரோல், ஒண்ணு வில்லி வேறன்னு சொன்னதும் ஸ்கோப் இருக்கற படம்னு நினைச்சிருப்பாங்க!

ஹ்ம்ம்… ரெண்டாவது சமந்தா என்ட்ரி ஆனதுமே என் பக்கத்துல “என்னாங்கடா நடக்குதிங்கேன்னு சவுண்டு!!!!

சத்தியமா சொல்றேன் ஸ்டோரி லைன் நல்லா திரில்லிங்கா தான் இருக்கு! விக்ரம் வன் ஆர்மி ரோலுக்கு செமயா செட் ஆகறார்.
ஆனா எனக்கு ரெண்டு சமந்தாவோட காரக்டரைசேஷனும் ஊத்திக்கிச்சுன்னு தோணிச்சு. அதைவிட அரதபழசான முட்டாள் வில்லன் காரக்டர், இன்னும் சில பல லாஜிக் ஓட்டைகளால படம் பிடிக்கல! விக்ரம் சார்…இவ்ளோ காலம் நடிக்கறீங்க. இன்னும் எப்படி சார் இப்படியான கதைகள்ள மாட்டிக்கிறீங்க? உங்களை நம்பி எப்படி நாங்க படம் பார்க்க வர்றது?

விஜய் மில்டன் சார்.. என்னாச்சி????

மியூசிக் டிரெக்டர் இமான். எனக்கு bgm பிடிச்சு இருந்தது. டெக்னிகல் விஷயங்கள்ல கருத்து சொல்ல எனக்கு அவ்ளோ அறிவில்லை மக்கா. படத்துல ரெண்டு பாட்டு ரொம்ப பிடிச்சது.
vroom vroom சந்தோஷ் பாடினது, ஆனாலும் இந்த மயக்கம் சத்யப்பிரகாஷ் பாடினது. ரெண்டுமே சூப்பர்.

படத்துல நான் என்ஜாய் பண்ணது. ரெண்டு பேரும் நோர்த் இந்தியாக்கு ட்ராவல் பண்ணின சீன்ஸ். நல்லா இருந்துது. விஷுவலும் ரொம்ப அழகு.சமந்தா கூட! கியூட் சீன்ஸ் கொஞ்சம் இருந்துது. ஒரு மொனாஸ்ற்றி வரும்..போய் பாக்கணும்னு தோணிடுச்சு!

நீங்க பார்க்கப்போறீங்களா மக்களே? எனக்கு இது இன்னொரு ரா பாட்டை தான்! தெலுங்கு படம், மசாலா படங்கள் பார்த்த அனுபவம் நிறைய உண்டு என்றால் போகலாம். எனக்கு என்ன சொல்றதுன்னே புரியல!

P.S: தயவு பண்ணி இனிமே இலங்கை தமிழர்களை விட்டுடுங்க சாமிங்களா!!! தாங்க முடியல!!! இதை நாங்க ரசிப்போம்னு நினைக்கறீங்களா? ஐயோ பாரீன் வாழ் சிலோன் சிட்டிசன்ஸ் தயவு பண்ணி எந்த படத்துல எங்களை பத்தி யாராவது ஒரு வசனம் வச்சா கூட பொங்கி நீங்க பொங்கல் வைக்கறதால தான் உங்க பணத்தை டார்கெட் பண்ணி இவங்க இப்படியே பண்ணிட்டிருக்காங்க! ஒரு சினிமா வசனம் எங்களை எந்த விதத்திலும் பாதிக்காது! நாங்கள் அப்படியெல்லாம் உணர்ச்சி வசப்படுபவர்கள் கிடையாது! இப்படி அவர்களை பழக்கப்படுத்தி விட்டு கேவலமாய் காட்டி விட்டான் என்று கூப்பாடு போடுவது முட்டாள் தனம்!

இந்த படத்தில் கேவலமாய் காட்டிவிட்டார்கள் என்று அர்த்தமில்லை. ஆனால் அந்த காரக்டர் படத்துல தேவையே இல்லை! காரக்டர் தேவையோட இருந்தா நாங்க மதிக்கறோம்,தேவையில்லாம தயவு பண்ணி எங்களை உள்ளே இழுக்காதீங்க! என் மனசுல இருந்ததை சொல்ல இந்த இடத்தை யூஸ் பண்ணிக்கிட்டேன் அவ்வளவுதான்!

நன்றி நன்றி நன்றி!

உத்தம வில்லன்



Production: Kamal Haasan, N Lingusamy
Cast: Andrea, K Balachander, K Viswanath, Kamal Haasan, Parvathi Menon, Pooja Kumar
Direction: Ramesh Arvind
Screenplay: Kamal Haasan
Story: Kamal Haasan
Music: M Ghibran
Background score: M Ghibran
Cinematography: Shyam Dutt
Dialogues: Kamal Haasan
Editing: Vijay Shankar

கொஞ்சநாள்களாக இம்சையான பாராட்டுக்களின் முன் அமர்ந்திருக்கும் கமலைக்கண்டு கமல் ரசிகையான எனக்கே கொஞ்சம் அலுப்புத்தட்டியதால் எப்படி இருக்கப்போகிறதோ என்ற மனத்துடனே உத்தமவில்லன் பார்க்க சென்றிருந்தேன்.

முதலாவது காட்சி கமல் அரிதாரம் பூசி வலுக்கட்டாய இளமையை வரவழைத்துக்கொண்டு, இயந்திரத்தனமான நடன அசைவுகளுடன் லவ்வா என்று பூஜா குமாருடன் ஆட ஆரம்பிக்கிறார். அவ்வளவு தான் முடிந்தது என்று எண்ணிக்கொண்டு விட்டேன். பிறகு ஒவ்வொரு காட்சியாக திரையில் விரிய விரிய அப்படியே எங்களை இழுத்து கட்டிபோட்டு விட்ட வித்தையை இன்னும் என்னால் இனம்பிரிக்க முடியவில்லை.

இது வழக்கமான மசாலா நகைச்சுவை படம் அல்ல.நகைச்சுவை என்று தனியாக எதுவுமே இல்லை. திரைக்கதை என்றால் காதல், பல தாரம் என்று வாழும் ஒரு நடிகனின்(மனோரஞ்சனாக கமல்) வாழ்க்கையைத்தான் திரைப்படம் சொல்கிறது . குறிப்பிட்டு சொல்ல எதுவுமே இல்லை, இருப்பினும் மனம் நெகிழ்ந்து என் கண்ணிலும் ஒரு சொட்டுக்கண்ணீர் வந்தது. திருப்பங்கள் உண்டு ஆனால் அதில் எதை அவிழ்த்தாலும் உங்களுக்கு படம் பார்க்கும் ஆர்வத்தையே இல்லாமல் செய்து விடும். ஆகவே மேலோட்டமாகவே சொல்லி சென்று விடுகிறேன்

கமல் வசனங்கள் என்பதால் அவருக்கேயுரிய குசும்புடன் புத்திசாலித்தனமாக அங்கங்கே ஷொட்டு வைத்து போகிற போக்கில் நகைச்சுவையை அள்ளித்தெளித்து அங்கங்கே கத்தி போலவும் கீறிசெல்கின்றன. நதியில் அலையாய் நகைச்சுவை சோகம் உணர்வுகள் என்று எழுந்து எழுந்து அடங்குகின்றன.

இயக்குனர் சிகரத்துக்கு இதை விட சரியான tribute வேறு எதுவாகவும் இருக்க முடியாது! படத்தில் வரும் நடிகன் கமலாக கேபியை தான் நான் பார்த்தேன். கலைஞர்கள் சாகாவரம் பெற்றவர்கள் என்பதுதான் எவ்வளவு உண்மையானது!

மனோரஞ்சன் என்ற மிகப்பெரும் புகழ்வாய்ந்த நடிகனின் கதையில் ஒரு நடிகன் இழந்த தனிமனித சுதந்திரம், பிள்ளைகளுடனான அவனுடைய நேரம் எல்லாமே அலட்டலில்லாமல் போகிற போக்கில் சொல்லி சென்றார்.

பந்து விளையாடும் மகனிடம் நீ என்னவாக ஆகப்போறே என்று கேட்பாரே! அந்த இடம்… ஓ… கமல்!

மார்க்கதரிசி(கேபி) இயக்கும் திரைப்படத்தில் அவர் பூஜா குமாருடன் நடிக்கும் அந்த அரச கதையை மனோரஞ்சனின் வாழ்வுடன் தொடர்புபடுத்தும் விதம் ரொம்ப பிடித்திருந்தது! ஆனால் அங்கே கொஞ்சம் கத்தரி போட்டிருக்கலாம்..ரொம்பவே நீளம்!!!


ஊர்வசி மனோரஞ்சனின் மனைவியாக ஒரு சராசரி பெண்ணாக அருமையாய் நடித்திருந்தார். அண்ட்ரியா ஒரு டாக்டராக தனக்கு தரப்பட்டதை நிறைவாய் செய்திருந்தார். ஜெயராம் கொஞ்சமே வந்தாலும் gentleman ஆகவே வந்து சென்றார். M. S பாஸ்கர் தவிர்க்கவே முடியாத பாத்திரம், நிறைவாக செய்திருக்கிறார்.

நாசர் அந்த மார்க்கதரிசி திரைப்படத்தில் வில்லன், நகைச்சுவை பகுதியை அப்படியே நிரப்புகிறார். பூஜா குமார் இளவரசி! நடனம் அழகு நடிப்பு என்று இவருக்கு வாய்ப்பு அதிகம் இருந்தது. சாவை வென்றவனாய் அப்பாவி உத்தமனாய் கமல் செய்வதெல்லாம் ஒரே சிரிப்பு. அப்படியே அந்த திரைப்பட பகுதிகள் மனோரஞ்சனின் வாழ்வுக்கு திரும்பும் போது நெஞ்சம் கனக்க வைத்தது.

சாவை வெல்ல உத்தமன் மூன்று வழிகள் சொல்கிறார்.

1. முக்காலமும் உணர்ந்த ஞானியாவது
2.
காவியம் எழுதுவது
3.
ஒரு கலைஞனாவது

ரசித்தேன்!

பார்வதி மேனன் ஷார்ட் பாப்பில் ரொம்ப அழகாக இருப்பது மட்டுமல்ல கொஞ்சமே வந்தாலும் அவரது கண்களே கதை சொல்லின. whatever என்று மனோரஞ்சனை சந்தித்ததும் கோபமாய் பேசுவதும் பிறகு உருகுவதுமாய் நடித்திருந்தார். கமல் மகனுடன் இவரது உறவு கவிதை, அந்த ஹேர்ஸ்டைலில் தான் இவர் வருவார் என்று முதல் பகுதியிலேயே நான் ஊகித்து விட்டேன் ஹி ஹி ஹி ஹி

இரண்டாவது கதாநாயகன் ஜிப்ரான்! பாடல்களில் அவ்வளவு கவரவில்லை. முதல் பாடல் படத்துக்கு சம்பந்தமே இல்லாத பெப்பியான ஒரு டூயட் அதையும் நீங்களே பாடவேண்டுமா கமல் சார்? அதையாவது வேறு யாரிடமும் தந்திருக்கலாமே! ஹா ஹா பின்னணி முழுதுமே கமல் குரல் தான் ஆக்கிரமித்திருக்கிறது படம் முழுதும்! பாடல்கள் எதுவும் என்னை கவர வில்லை முதலில். இருந்தும் நவயுக மனோரஞ்சனின் வாழ்க்கை, ராஜா ராணி கால கதை என இரண்டு காலகட்டத்திலும் பின்னணி இசையில் அப்படியொரு மிரட்டல் இசை! வாழ்த்துக்கள் ஜிப்ரான்! படம் பார்த்தபின் காதலென்னும் கடவுளின் பாடல் உதடுகளில் ஒட்டிக்கொண்டிருக்கிறது.

எனக்கு படத்தில் மிகப்பிடித்த விடயம் குறியீடுகள்..மூன்றை மட்டும் சொல்கிறேன்

அந்த ராஜா ராணி படத்தி பெயர் உத்தம வில்லன், அதை டைரக்டர் எடிட் செய்ய ப்ரொஜெக்டரில் போட்டு விட்டு டைட்டில் தெரியும் படி திரையை வைத்தபடி கமல் அந்த முக்கியமான லெட்டரை படிப்பார். அப்போது சரியாக கமலின் தலையின் நிழல் அங்கே பொருந்தும்!

இன்னொரு இடம் உத்தமனாக நடிக்கும் போது கேபி பயந்து போய் கட் சொல்வார். ஒன்றுமே இல்லை என்று சமாதானம் சொல்லியபடி வந்து கமல் ஒரு கப்பலை பார்க்க இறுதி மூச்சுக்கு துடிக்கும் மீன்கள் அப்படியே ஸ்க்ரீனில் வரும்!

மூன்றாவது மகனையும் மகளையும் முக்கியமான லெட்டரை படிக்க அழைத்து செல்லும் போது அவர் இரணியன் வேடத்தில் தெய்யம் நடன மேக்கப்களை முகத்தில் பூசிக்கொண்டிருப்பார். பிறகு அவர்கள் இருவரும் லெட்டர்களை படிக்கும் போது அருகில் இவர் சாவகாசமாக மேக்கப்பை கலைக்க ஆரம்பித்து அவர்கள் முடிக்கும் போது மொத்த வேஷத்தையும் கலைத்திருப்பார்!

இப்படி படம் முழுதுவதும் பலப்பல விடயங்கள்!

கடைசியில் இரணிய நாடகம் கமல் என்னும் நடிகன் எப்படிப்பட்டவன் என்பதற்கு இன்னொரு உதாரணம்!

எனக்கு மனதில் நெருடிய ஒரே ஒரு விடயம் அண்ட்ரியா

அன்ட்ரியாவுடனான அவரது உறவு மனோரஞ்சன் எந்த கட்டுக்களுக்கும் உட்பட்டவர் அல்ல. வெகு இலகுவாக போகிற போக்கில் வாழ்பவர் என காட்டுகிறதே. பிறகு யாமினியுடனான காதலுக்கு மட்டும் ஏன் இப்படி ஒரு முக்கியத்துவம் அந்த கதாபாத்திரத்தால் தர முடிந்தது? கமல் தனது சொந்த வாழ்க்கையை திணித்து விட்டாரா என்று ஒரு கணம் எண்ணத்தோன்றியது, வேறு விதமாக கூட இருக்கலாம் ஆனால் எனக்கு புரியவில்லை.

மொத்தத்தில் படம் எனக்கு நிரம்ப பிடித்தது! வித்தியாச முயற்சிகளை தொடர்ந்து கொடுத்து வரும் கமலுக்கு என் வணக்கங்கள்.

இது என்டேர்டைன்ட்மென்ட் படம் அல்ல, நகைச்சுவைப்படமும் அல்ல, இது இல்லாமல் உங்களால் படத்தை ரசிக முடியாது என்றால் நீங்கள் செல்லாமல் இருப்பது உத்தமம். புகழ் ஏணியின் உச்சத்தில் இருப்பவன் ஒருவனின் வாழ்க்கையை எந்த வொரு சமரசமும் செய்யாமல் ஆங்காங்கே உணர்ச்சி குவியல்களுடன் செல்லும் படத்தை ஒரு வித்தியாச அனுபவத்துக்காக நிச்சயம் ரசிக்கலாம்!